[ পড়ার নিয়মঃ যেসব ব্যঞ্জন বর্ণ কোন চিহ্ন যুক্ত নয় সেগুলো অকারান্ত ধ্বনি দিয়ে পড়তে হবে। আর যেসব বর্ণের সাথে ‘ হ ’ অক্ষর যুক্ত আছে সেগুলো মহাপ্রাণ বর্ণের মত ঈষৎ জোড় দিয়ে পড়তে হবে।]
চম্পকনগর খ্যংতুলি, পালাত ধল্ল গেংখুলি।
পুরোনি দিন মাদান সত্য যুগ, ঘরত বান্যে এল সুখ।
নানান জিনিস নানান রং, ধানে সুধোয় অল সং।
যগন ধান ছড়াৎ ধল্ল রং, গাবুজ্যে গাবুরি অলাক সং।
শুল দারু মিধ্যে ফুল, ফুল রাজা নাকসা ফুল।
দেবংসি ফুল গিলেত্তাক, ভরোন্দি আদামর মিলে ঝাক।
পাল বাদ বেরাদন গাবুর লগ, হারা হোয় ধুজ্জোন গুরো লগ।
উদিল পুগেদি পুনং চান,
পরান দা পরান বি বাজেলাক মেয়্যের বান।
দাগের হোগিলে ফাগুনো মাস, লাঙেল দিঘোলি শিমেই গাছ।
উরায় বোইয়েরে তুলো আনি, হুন্ধি ভুঙি পুজ্জেগোই হিজেনি।
পর ঘর-বাড়ি চাল চড়োই, ইজোরো মাদাত ধান তোলোই।
মেল্যে ধান তোলোই হুরোয় হায়,
হিজেনি পরানবিরে হন্না পায়।
উজোনি ছড়া লামনি ধার,ধিঙি চালত্তুন দেগে গাঙ পার।
লামনি যাদন ভাজন্যে, বারাহ লামেয়ে পরানবি সাজন্যে।
বারাহ জারি থাচ থাচ থাচ, তুলি দিঘালি ধিঙি গাছ।
বঙ্ল গাছ হত্তা অজাবো, বাজাদে হামাজ্জ্যে মজাবো।
মজা মাত্তে গজ্জে ঘা,
হামত্তুন এই গাঙত যার পরান দা।
পুনোত্তলে অজাবো, ধত্তে বাজ্জে হানি বেনাবো।
মজাবোরে গেল মারে, দুত্তোত হামাল্ল্যে তম্মারে।
হানি হানি বানের ঘা, হবর পেনেই পরান দা।
ধিঙি শালত লুম্মেগোই,
হি উয়ে হি উয়ে গুরি সুম্মেগোই।
গানঝা ফাদি ঘা বানে, তুও লো যানায় ন মানে।
দারু বাদি আসাম দিক, মন্দরে পরান দা গল্ল ঠিক।
হাদিত পুজি ঘামানি, আজং আজং গুরি হয় লাঙোনি-
হিল্লে হুদু যেবে দা তুই? পোত্ত্যে হাবর দোমবোই মুই।
তরে আঝা দিলুং মুই,বারা বানা বালা ধারা ও দা তুই।
রেদোত দোগোল্ল্যে জুনি বাগ, বারা বানদে ওল রেত সম্বাক।
বারা বানি ফুরেলাক, যার যে গরত তে গেলাক।
আগনি জাভা গেল তুজ হুরোত, পিড়া জম্মেল দ্বিজন অন্তরত।
পাঘোম বলাদন হোদোরে, চোগে ঘুমে আর ন ধরে।
যগন জুরো ওল জুনি বাগ, পোত্ত্যে হুরোয় দিল দাগ।
আত্ত্যে রাদায় দাগ ধল্ল, ইন্দি পরান বি হি গল্ল?
উত্ত্যে পরানবি ঘুমোত্তুন, পানি ধালি হুমোত্তুন।
ঘর দোর হাজেল সাফ গুরি, যুগল্ল পান হিলিগ আগ গুরি।
ঝাড়ত থিক্কাল্ল চঙরা,ফুলোত গুজুত্তোন ভঙরা।
ভঙরা ফুলোত গুনগুনায়,
সেদিন্যে পরানদার পরানে ধুমধুমায়।
হাদে তদাৎ আর বাচ্ছে পা, থেই দ ন পারের আর পরান দা।
বিচ্ছোন পত্তর ভুদি তোল, সমাজ্জ্যে লগরে দাগি হোল।
যাঙর ভেইলক মুই শিগারে,
হামত ন জেম হোই গোগোই বাবারে আর মামারে।
ঘরত্তুন লামিলো পরান দা, বাগি পরানদোই আগে পাহ্।
পদ পাজারাত জুস গুরি, বাচ্ছে রুয়েগোই চুপগুরি।
ইন্দি পোজা বিরে সোমুরি,
হুয়ো গাঙত যেবার জুগুলার পরানবি।
বোদি ঘুমো তোলোইয়ান, বুগো হাদিত শোলোইয়ান।
ঝুদোত গুজেইয়ে দক চিলিক, দুধোত গুজেয়ে পান খিলিক।
হাবর দোয়্যে সাগোনে, গাঙত যা দল্ল পরানে।
পেজা উরি গেল পদত্থুন, লোজ্যে পাচ থাগুর ঘদত্থুন।
ভঙরা গুজুত্তন চাংফুলত, লুম্বেগি পরানবি গাঙহুলোত।
পানি ভরি জুস গুরি, পোজ্জেগি ইদে ধুপ গুরি।
ইদে পুরি দোরে ল, মনে মনে ভাবিল।
রিনি চেল চেরোদিক,
পরান দা শিক হারের চিচিক চিক।
ভঙরা গুজুত্তোন চাং ফুলোত, দেগা দিলোগি পরান দা গাঙহুলোত।
উবুরে হাবত উদিলাগ, নানান হদা তুলিলাক।
আজাআজি গুরিলাক, চুমো চুমি গুরিলাক।
ধোরেই দিল দিক চিলিক, হাবেই দিল পান হিলিক।
ফুল হাদিলোই ব বাঝায়,হল পরানবি ত আঝায়।
তোই দোং যৌবনান আগ গুরি, ধোল্য পরান দা তারে পাকগুরি।
মাল্য মৃগ ম্যুহ বনত, রজর হারা ওল হুয়ো গাঙত।
পাল্ল্যেই উদিল বর পদা, শেবত গুরি হল লাঙ্যে দা।
তল্লোই গিরিত্তি গুরিমবোই, যানি ন পেলে মুরিমবোই।
ফুলর ভঙরা মধু হায়, যেদক হুজি পেট ভরায়।
গুঙুরো পুজ্জোন গাঙচরত, এত্তন মিলেগুন হুম হরত।
চিদ মনত লাগি গেল,
বেরাহ্ পদেদি লাঙ্যেগা ঘরত গেল।
এলাক মিলেগুন ঝাক গুরি,
পানিত পুজ্জেগোই লাঙ্যেবি পোঃ গুরি।
তলাগ হুম হুত্তি পিলেগুন, সাগোন তোগা দাগের মিলেগুন।
এজনা বোনলোক এজনা, সাগোন তোগা বল দোনা।
গাঙত পল্লাককোই ঝাগে ঝাগ, তারারে লাঙ্যেবি দিল ফাঁক।
কাচলি তদেগে হের্হেরায়, ঘরত বুড়ি পেরপেরায়।
আদত লোয়ে সোরোন্দার, এদক্ষণ গাঙত হি দেরী যার।
ভোরোন্দি আদাম সুজ্যা ঘর, বৌ দেয়্যা পুরিবু বুজ্জে হর।
মাধাত ভঙের বড় মুগোর,
হবাল পুরোনি হমলে হিজেনি দে শুগোর?
এভে পরানবি লুম্মেগি, পেরপেরানি শুন্যেগি।
তারে পরানবি দিল ফাগ, হিত্যেয় দেরী ওল শুনি থাক।
সাগোনান আজেয়ং মর মাছ, তালি দিলগোই যেন সাধ।
পোত্য ন অল ওমা তর, মিলেগুনোত্তুন পিজোর গর?
মিজে হদা হল হেই, হেল অগদা লাঙ্যে বেই।
আবুহদা দিন্নো গেল, পুজিমে ধুবিলু পুগোর বেল।
পিজোরো হুনেদি দাদা চেই গেল, চুবে চুবে তারে হই গেল।
বেল্যে দগল্ল্যে তিধি গেইক, থবাক বাচ্চেম্বি নিঝি রেত্।
নিঝি রেদোত জাগিবে, ভাবনা থেলে লামিবে।
লামি মুল পরাণ দিবেগোই, লগে সমজ্জ্যা অবেগোই।
জুন পুজ্জে ভুই আদদে, পরান ন জুড়োয় তুই বাদে।
হদা হোয়নেই যিয়েগোই, ধান বুগোত উত্যেগোই।
পিজেদি ভাত মজা তাঙ্যে পাহ্, বাজি বা ধল্ল লাঙ্যে দা।
বাজি র শুনি মন হানে, ইন্দি পরানবি তোন রানে।
তোন তাবা সিদোলে, হাম গুরিবু আর হি দোলে?
ভাত তোন রানা নেই অইয়ে, লাঙ্যেদা ইন্দি মন জিয়ে।
উদুরেই পরেল্লোই পিলেগুন, ভাত পিলেবুত দিল নুন।
ভাত্তুন মেদেরা মু হেলাত, তোন পিলেবুত পুগুলাক।
মনে গরের বিগিদি, হোরোই দেদে দ্যে সিবিদি।
ছাগি দিল হাঙারা, মুরিচ বাত্ত্যেত আঙারা।
মুরিচচান অল হালা রং, আগুনে হেলবেয়্যে চোগো ভং।
ঝড়ি পুজ্যে হাদিয়ান, মাদিত পুজ্যেগোই কাদিয়ান।
ধারা বেইয়্যে পরের ঘাম, আদত ন উদের হন হাম।
হিজে হিচ্ছে হাম গরে, দিল ভাত বারি তা বাবমারে।
আগুন ঝাবেই জুরেল পাহ্ , থবাক বাজেয়্যে লাঙ্যে দা।
হুগুর ভুগিলু ভেউ গুরি, উত্যে লাঙ্যেবি উগুরি।
দোরেই গল্ল চেদক তক, থার পিয়োন আদাম্যে গাবুরলক।
ঘর পজা গুজ গুরি, লাম্যে লাঙেবি জুস গুরি।
ভুগা দুজ্জ্যে হুগুরবো, নাগা মারের শুগোরবো।
জুন পুজ্জ্যে ব হাদন, মানুষ জন আর ন চাদন।
লামিলাক গাবুরলক ঝাক গুরি, জাগায় জাগায় তাক গুরি।
মিলেয় মদ্দে দিলাক চোগ, হিঙিরি ধরা ন পরন দেঘা যোগ।
ধনু শিগারি মাল্ল তীর,পুয়াগাত লাক্কে লাঙ্যেবির।
লাঙ্যে আগুনে মন পুরে, বিচার গল্ল রাজ ঘরে।
বাদিয়ে গল্ল বাদ নজর দি, নজর সমারে তলবদি।
সে আদামর সাগিমে, জারি গল্ল আগিমে।
জারি গরা সিবেই এল, তারিখ দিনেই ফিরি গেল।
হই ন পাল্লাক ক্যজনে, আজিল অলাক্কোই দ্বিজনে।
জবান বন্দি লিগিলাক, সাক্ষী সাবুদ দি গেলাক।
সত্য হদা হলাক্কোই, দুজ্যে দুজোনি অলাক্কোই।
হলঙ্খ তলাত পল্লাক্কোই,গারি গুনআর দিলাক্কোই।
আগাজ ভাঙি পুজ্যে পাহ্, দশরে শুগোর দিল লাঙ্যে দা।
দুজোনি ভাগত পল্ল হি? তেয়্যু শুগোর দিল লাঙ্যেবি।
জরিবানা পোজোছ ওল, দশে পনেরই ভাগত পোল।
খুয়া ভাঙোনি দি টেঙা, নজর তলব দ্বি টেঙা।
দুজ্যে দুজোনির শাস্তি ওল, সিনালা নিয়মে বিচার ওল।
লুয়ালি তারার হি অব? বাব মা বেরাজি ন অব।
যানি রাজি ওই থেলে, চুমুলোং গুরিবাক গমেদালে।
জাতিয় বিচার দি ধগে, হিল্ল্যে গরবা যেই আগে।
যানি গরবা ওই থেদ, জুদা শাস্তি তে পেদ।
পুরো শাস্তি পঞ্চাজে, অব আর তার শেজে।
তিন ফালায় চুল হাবিবু, হুরো বাহ্ তদাত তাঙিবু।
আদত লব হেম তারা, ঘরে ঘরে ফিরের ধেন্দেরা।
পতি উদোনত যেই পেব, হি উয়ে তার হোই পেব।
গদা আদামান গরগোই, গাদি বুরপারি এবগোই।
পানি ঢালিবু বটগাজত, তে মিজেই পারিবু সমাজত।
[ যদি কোন সংশোধনি থাকে তাহলে দয়া করে কমেন্টের মাধ্যমে জানাতে ভুলবেন না। Ojana-Kishu ব্লগের পক্ষ থেকে আপনাকে অসংখ্য ধন্যবাদ।]
0 মন্তব্যসমূহ